A FGM abre a convocatoria para presentar as candidaturas aos «Premios do Alpinismo Galego» na súa Quinta Edición

A Federación Galega de Montañismo (FGM) convoca por quinto ano os PREMIOS DO ALPINISMO GALEGO, co obxectivo de recoñecer e valorar as actividades feitas durante este período, iniciativas cunha especial singularidade e/ou relevancia, ou simplemente por calquera circunstancia que contribúa a salientar ou promocionar as actividades relacionadas coa montaña.

Tamén se valorará unha traxectoria deportiva. O período de realización de actividades vai desde os anteriores premios 2022 ata a concesión dos actuais de 2025, concederanse 3 categorías:

• MELLOR ACTIVIDADE (período sinalado: desde maio de 2022 ata a actualidade)
• MELLOR TRAXECTORIA (pode ser traxectoria xuvenil ou a toda unha vida)
• MELLOR PROMOCIÓN (actividades de difusión e promoción do alpinismo)

Estes Vº Premios do Alpinismo Galego, alén dun recoñecemento público, queren pór en valor as actividades que realizan os deportistas e as deportistas galegas neste ámbito, establecer puntos de encontro do alpinismo e visibilizar este deporte, que transgrede o espazo competitivo tradicional, para adentrarse nun contorno máis particularizado onde o salientable é a extraordinaria natureza destas xestas e o mérito deportivo de alto nivel como reto persoal e humano. A aventura non se pode cuantificar pero podemos comprender a súa excelencia igualmente.

CARACTERÍSTICAS XERAIS:

◆ Quen pode presentarse como candidato/a: calquera que considere que é merecedor/a dunha destas distincións (sexa individuo, colectivo, ou empresa) pode ser candidato e presentarse por si mesmo. Tamén poden ser presentados/as por amigos/as, Clubs, empresas ou outros colectivos que así o consideren, sen ningún compromiso, simplemente o xurado valorará a súa suxestión.

◆ Período e prazo de presentación: A periodicidade anual veuse afectada por outros condicionantes, nesta edición, no espazo que vai desde os premios 2022 (maio) ata a fin do prazo de presentación, que se estenderá desde a publicación desta convocatoria ata o 30 de xaneiro de 2025, día no que remata o prazo para propoñer candidaturas.

◆ Premios: O único premio dotado dun agasallo económico será o de MELLOR ACTIVIDADE, e estará dotado cunha bolsa de 900 euros. Todos os premios constitúen basicamente un recoñecemento federativo a estas actividades non competitivas. O xurado pode considerar deixar algún premio deserto.

◆ Xurado: Os premios serán concedidos por un xurado plural, expertos/as en varios ámbitos do alpinismo, cunha traxectoria deportiva contrastada e, en xeral, alleos á directiva da FGM. O número de persoas que formarán o xurado será de 5, que chegarán a un acordo, na medida do posible, ou votarán en caso de discrepancia. Calquera membro do xurado que fose proposto para algún premio ausentarase das deliberacións e/ou votacións da categoría á fose presentado/a. Un dos membros do xurado, nomeado polo propio xurado, será o Coordinador e, xunto con alguén da Vogalía de Alpinismo da FGM -que non terá nin voz nin voto-, supervisarán a admisión de actividades e as propostas de premios nunha aplicación informática, alén de aclarar as dúbidas, en caso de xurdir, sobre este regulamento.

◆ Como enviar as candidaturas: Enviar a proposta ao correo electrónico alpinismo@fedgalmon.gal cos datos que se indican na convoctoria.

Descarga e le a información ampliada na convocatoria adxunta: