Desde a Federación Galega de Montañismo anunciamos a celebración da Marcha Galega de Veteranos FGM 2026, que terá lugar o vindeiro domingo 20 de setembro no concello de Lalín, en Pontevedra. Organizan esta actividade a Sociedade de Montaña Ártabros e a Vogalía de Andainas e Sendeirismo, coa finalidade de reunir deportistas e clubs de montaña de toda Galicia.
A marcha desenvolverase polo entorno do castro de Doade e o río Asneiro, seguindo o itinerario PR-G-210. Trátase dun percorrido circular de 17 quilómetros, con saída desde a Casa do Patrón de Lalín, en Codesedo, e un desnivel positivo e negativo de 476 metros.
Ao longo da ruta pasaremos por lugares como O Cruceiro, San Tomé, Carracedo, o castro de Doade e Os Muíños, nunha xornada pensada para gozar da natureza, do patrimonio e da convivencia entre as persoas afeccionadas ao sendeirismo.
A participación está reservada exclusivamente a persoas federadas. Establecemos un mínimo de 15 participantes e un máximo de 100. O prazo para inscribirse na ruta rematará o 15 de setembro, mentres que as inscricións para participar no cocido estarán abertas ata o 11 de setembro.
O prezo da inscrición é de 5 euros por persoa para realizar o roteiro. Tamén ofrecemos a posibilidade de incluír un cocido completo por un prezo total de 37 euros. A actividade inclúe, ademais, a entrada ao Museo Etnográfico Casa do Patrón, onde se celebrará o xantar.
Animamos todos os clubs e asociacións montañeiras galegas a participar nesta nova edición da Marcha Galega de Veteranos e a acompañarnos nunha xornada deportiva e de confraternidade no corazón da comarca do Deza.
Aquí está a ligazón para rexistrarse >
Descubre máis desde Federación Galega de Montañismo
Subscríbete para recibir as últimas entradas no teu correo electrónico.