A Federación Galega de Montañismo celebra a próxima XIX Andaina de Outono do Barco de Valdeorras, organizada polo Club Peña Trevinca Barco e o Concello do Barco, que se desenvolverá o domingo 9 de novembro a partir das 9:00 h dende o Polideportivo de Calabagueiros.
Esta cita, que reúne preto de 350 participantes procedentes de toda Galicia —cunha notable presenza da provincia da Coruña—, representa un referente no calendario de andainas federadas. O evento ofrece dúas alternativas de percorrido: unha ruta curta de 15 km (413 m de desnivel) e outra longa de 25 km (915 m de desnivel), que discorren pola contorna das Penas Marías e Xagoaza, zonas afectadas polos incendios do pasado verán.
O vogal de Andainas e Sendeirismo da Federación Galega de Montañismo, Henrique Freixeiro, destacou durante a presentación que “esta actividade será a guinda de todas as andainas deste ano en Galicia, pois pecha o noso calendario oficial cunha das probas máis queridas e mellor valoradas polos participantes”. Engadiu ademais que “a Andaina de Outono do Barco é exemplo de boa organización, espírito montañeiro e posta en valor do territorio”.
A Federación Galega de Montañismo quere felicitar ao Club Peña Trevinca Barco polo seu traballo continuado ao longo de 19 edicións, así como ao Concello do Barco, á Deputación de Ourense e ás empresas colaboradoras polo seu apoio a unha actividade que combina deporte, natureza e convivencia.
Con iniciativas como esta, o sendeirismo galego consolídase como unha ferramenta esencial para promover o coñecemento das montañas de Galicia, fomentar o respecto pola natureza e fortalecer a comunidade montañeira.
Descubre máis desde Federación Galega de Montañismo
Subscríbete para recibir as últimas entradas no teu correo electrónico.