O vindeiro sábado 25 de outubro, a estación invernal de Manzaneda converterase no punto de encontro para os e as afeccionadas á Marcha Nórdica, coa celebración da II Proba da Liga Galega de Marcha Nórdica. Trátase dun evento que busca promover, difundir e dar a coñecer esta disciplina deportiva, que combina exercicio físico, natureza e convivencia.
Esta cita forma parte das catro probas oficiais da liga, que se desenvolven ao longo do ano nas diferentes provincias galegas, grazas á colaboración entre os clubes organizadores locais e a Federación Galega de Montañismo. Nesta ocasión, Manzaneda ofrece un escenario perfecto para a práctica da Marcha Nórdica, cunha contorna natural única e unhas instalacións preparadas para recibir tanto a participantes como a acompañantes.
Ademais da proba principal, a xornada incluirá actividades complementarias pensadas para o goce de todas as idades e niveis, fomentando o carácter formativo, educativo e lúdico do evento. A proba non terá un carácter competitivo, polo que non se contemplarán sancións, agás nos casos nos que a arbitraxe detecte que algún participante estea correndo, xa que a esencia da marcha é manter un ritmo constante e unha técnica correcta.
A estación de Manzaneda pon á disposición dos visitantes apartamentos con diferentes capacidades e servizos, ideais para quen desexe prolongar a estancia e converter a experiencia nunha escapada de fin de semana. Tamén conta con restaurantes e cafeterías que completan a oferta, permitindo desfrutar dun día de deporte e natureza nun dos enclaves máis emblemáticos do interior galego.
A II Proba da Liga Galega de Marcha Nórdica preséntase así como unha excelente oportunidade para achegarse a esta disciplina en crecemento, coñecer a súa técnica e valores, e compartir unha xornada saudable nun entorno incomparable.
Máis información e inscricións NESTE LIGAZÓN
Vémonos alí!
Descubre máis desde Federación Galega de Montañismo
Subscríbete para recibir as últimas entradas no teu correo electrónico.