A Federación Galega de Montañismo anima os seus federados a apoiar a candidatura galega nos Premios FEDME 2026.
O sendeirismo galego está de noraboa. O PR-G 268 As Olas do Río Mao, en Ourense, é un dos tres finalistas que optan ao galardón Mellor Sendeiro Homologado de España 2026, convocado pola Federación Española de Deportes de Montaña e Escalada (FEDME).
Situado no corazón da Reserva da Biosfera Transfronteiriza Gerês-Xurés, este sendeiro destaca pola súa extraordinaria riqueza natural, a súa biodiversidade e o seu patrimonio histórico. O percorrido permite descubrir un territorio de gran valor ambiental, con numerosas especies de aves, presenza de fauna emblemática como o lobo ibérico e unha flora de especial interese. A súa conexión co patrimonio romano da Vía Nova engade, ademais, un importante valor cultural a unha ruta que une Galicia e Portugal.
A candidatura galega comparte esta distinción con La Concha – Pico Llen, en Cantabria, e Ruta Peñas Blancas – La Zarza, en Extremadura.
Un voto para o sendeirismo galego
Desde a Federación Galega de Montañismo queremos animar os nosos federados e federadas a participar nesta votación e apoiar o PR-G 268 As Olas do Río Mao.
É unha oportunidade para recoñecer o valor dos nosos sendeiros, dar visibilidade ao patrimonio natural e cultural de Galicia e contribuír á promoción dun sendeirismo responsable e de calidade.
A votación é pública, anónima e permite un voto por persoa.
📅 Prazo para votar: ata o 31 de outubro de 2026.
👉 Vota por As Olas do Río Mao:
Esta é a ligazón para acceder á votación.
Apoia o sendeirismo galego. Cada voto conta!
Descubre máis desde Federación Galega de Montañismo
Subscríbete para recibir as últimas entradas no teu correo electrónico.