Máis de 30 participantes entre os 16 e os 84 anos gozaron dunha emocionante travesía pola montaña ourensá, organizada con éxito polo club Montañeiros Celtas.
A Marcha Galega de Bivaque 2025 da Federación Galega de Montañismo celebrouse a fin de semana do 5 e 6 de xullo, cun percorrido esixente e fermoso pola serra de Petín. O evento, que contou cunha excelente organización por parte do club Montañeiros Celtas, reuniu a participantes de todas as idades nun ambiente de natureza, compañeirismo e superación persoal.
O pasado sábado 5 de xullo deu comezo, nas proximidades de Mones (Petín), unha nova edición da Marcha Galega de Bivaque, unha actividade xa consolidada no calendario da Federación Galega de Montañismo. O evento foi preparado con esmero polo club Montañeiros Celtas, que deseñou un trazado espectacular a través das montañas orientais de Ourense.
A xornada comezou cun sol impoñente e temperaturas elevadas, o que obrigou a marcar un ritmo pausado debido á falta de puntos de auga ata a chegada ao bivaque. A ruta ascendente levou aos participantes polos cumios do Alto do Campelo (628 m), Cabeza do Pau (1219 m), Alto do Monzón (1329 m) e Pena Forcada (1381 m), ata chegar a Santoalla do Monte (950 m), onde se instalou o campamento.
En total, máis de 30 persoas de diferentes idades —desde mocidade de 16 anos ata veteranos de 84— compartiron esforzo, paisaxe e boa compañía. A merenda-cena en común na aldea de Santoalla foi un dos momentos máis entrañables da xornada.
Na madrugada do domingo, a néboa cubriu o bivaque, e a humidade fíxose notar durante o almorzo e o comezo do descenso. A baixada ata San Fiz presentou tramos de notable dificultade técnica e forte desnivel, esixindo prudencia e concentración. Xa dende a presa de Santa Eulalia ata Portomourisco, o camiño suavizouse, ofrecendo un paseo comprometido e aéreo entre panorámicas espectaculares polo canón do río Xares.
Tras completar o percorrido, o grupo desprazouse ata O Bolo, onde se celebrou un xantar de confraternidade e o acto de clausura da marcha.
Dende a Federación Galega de Montañismo queremos agradecer especialmente a presenza numerosa da mocidade, que nos enche de ilusión e esperanza para o futuro destas actividades. Así mesmo, trasladamos os nosos parabéns ao club Montañeiros Celtas pola excelente organización e pola magnífica escolla do itinerario. A Marcha de Bivaque 2025 foi, sen dúbida, unha experiencia inesquecible para todas as persoas participantes.
