Convocatoria de ingreso de Técnica/o de Alta Montaña e/ou de Barranquismo 2025

OBXECTO DA CONVOCATORIA: faise para dotar á Escola Galega de Alta Montaña dun número suficiente de técnicos/as de alpinismo e de barranquismo que permita a realización das accións formativas que imparte a EGAM-FGM.

PERFIL HUMANO DOS/AS ASPIRANTES: Necesitamos na EGAM persoas voluntariosas, cordiais, entusiastas, responsables, flexibles, creativas, comunicadoras, abertas, traballadoras, seguras, preparadas, organizadas, orientadoras, avaliativas, motivadoras e humildes. Non queremos só “aos mellores deportistas do mundo” porque iso a nós nos valería para case nada, queremos ás mellores persoas do mundo da montaña que queiran aportar algo ao futuro do deporte, dos/as deportistas, e dos clubs de montañismo galegos. O noso Regulamento da E.G.A.M. (R.E.G.A.M) está dispoñible na web da FGM.

SISTEMA DE ACCESO: Poderán acceder á especialidade de 3 xeitos diferentes.

• 1- TÉCNICOS/AS FEDERATIVOS/AS (TF): Sen necesidade de titulación deportivas profesionais, e seguindo a tradición montañeira de aportar algo de ti ao resto dos barranquistas e alpinistas, a Escola Galega de Alta Montaña quere contar con todas esas persoas que estades nos clubs federados galegos, que non sodes técnicos/as deportivos titulados, e que tedes experiencia nalgunhas das nosas disciplinas deportivas, e moita vontade de colaborar na mellora do noso deporte. Os/as técnicos/as federativos/as (TF) non son profesionais dos deportes da montaña (como os Técnicos Deportivos (TD)) e só desenvolverán a súa función dentro da súa especialidade, e no eido formativo exclusivamente para deportistas ao abeiro do paraugas da Federación Galega de Montañismo, e sempre no seo de actividades oficiais.
• 2- TÉCNICOS/AS DEPORTIVOS/AS (TD): Seguindo as titulacións deportivas estipuladas no RD 318/2000, RD 701/2019 e a Orden ECI/858/2005 todas as persoas que estean en posesión do título oficial de Técnico Deportivo de nivel 2 ou 3 nas especialidades de Alta Montaña ou de Barranquismo poderán solicitar directamente o ingreso na EGAM.
• 3- TÉCNICOS/AS XA ACTIVOS NA EGAM: poderanse presentar a esta convocatoria tódolos técnicos/as activos/as da EGAM doutras disciplinas que así o desexen, cumprindo os requisitos previos establecidos, e tendo que superar só as probas específicas da disciplina elixida, tal como establece o noso REGAM.

PRAZO DE PRESENTACIÓN: O prazo oficial remata o 22 de decembro de 2025 ás 23.59 horas.