A Vogalía de alpinismo de Federación Galega de Montañismo abre unha nova convocatoria para formar parte do Equipo de Novos e Novas Alpinistas Galegos/as (ENAG). A formación avanzada e a tecnificación do alpinismo, teñen que ter o seu espazo no deporte galego e, os grupos de traballo de novos deportistas, deben inserirse dentro dunha planificación elaborada para un itinerario deportivo individual co asesoramento de técnicos con experiencia e todo o apoio económico e material posibles. Atender e potenciar este deporte de características non competitivas e que, porén, se nutre das grandes xestas de exploración e aventura, razón da nosa existencia deportiva, como o están facendo a maioría das federacións autonómicas e
segundo demanda a FEDME para os seus equipos absolutos de alpinismo, tanto masculino como feminino. Con esta convocatoria do Equipo de Novos e Novas Alpinistas Galegos (ENAG) seguimos pondo a semente que nos sitúa no alpinismo deportivo de alto nivel para, a modiño, ir subindo os chanzos que nos leven polos cumios das montañas do mundo.
Se cumpres os requisitos da convocatoria, tes un ánimo de rendimento físico e técnico na práctica da escalada, esquí de montaña (ou alpino), montañismo invernal o alpinismo, se estás motivado/a e te sentes atraído/a polos deportes de montaña, só tes que enviarnos o teu currículo deportivo e participarás na selección de deportistas que constituirán o ENAG.
CONDICIÓNS PARA PARTICIPAR
- Ter entre 18 e 30 anos e dispor da tarxeta federativa da FGM en vigor (mínimo mod. B)
- Enviar currículo deportivo e breve currículo persoal en prazo.
- Participar nas probas selectivas.
INSCRICIÓN
Enviar o currículo deportivo e un breve currículo persoal a alpinismo@fedgalmon.gal
O prazo para enviar currículos remata o 30 de novembro.
Tedes a información completa (condicións, prazos, incrición e probas) no PDF adxunto.
