COMUNICADO ARBITRAL

Estimados deportistas,

O pasado 25 de marzo, durante a realización da primeira proba da copa Xunta de Galicia de CxM, o equipo arbitral recibiu un gran número de queixas e comentarios de corredores que se saltaron unha parte do circuíto balizado para o efecto.

Tras unha primeira reunión na que se procedeu a valorar o sucedido, o equipo falou con corredores e procedeu a contrastar os tracks dos percorridos de deportistas que participaran no evento, comprobando que nun punto do percorrido os participantes saltáronse un bucle do circuíto acurtando varios quilómetros a proba.

Todos estes feitos foron postos en coñecemento e contrastados coa organización e dirección de carreira.

Nunha segunda reunión, na que se valoraron os feitos anteriormente descritos e as posibles actuacións respecto diso, por unanimidade decidiuse aprobar como clasificación definitiva da proba, a orde de chegada obtido no control de paso intermedio, situado no km 10 do percorrido e que estaba situado antes do cruzamento no que se producíu o incidente.

En consecuencia as clasificacións considéranse válidas para a primeira proba da copa Xunta de Galicia de CxM.

CRÓNICA 1ª PROBA COPA XUNTA DE GALICIA DE CxM “TOXIZA GRAN TRAIL 2023”

O 25 de marzo levouse a cabo a primeira proba da Copa de Galicia de carreiras por montaña no Concello de Mondoñedo (Lugo), organizada polo Club Toxiza Club de Montaña.

A proba contaba con un total de 24 km e 1400+. A carreira dou comezo as 10:30, na hora estimada, pero todo se truncou cando nunha zona do percorrido faltaban balizas e algúns dos corredores se perderon. Polo tanto unha vez chegada a meta moitos dos corredores decidiron entregar o dorsal xa que chegaban con algún metros de menos. Despois de unha reunión técnica entre o equipo arbitral decidiuse que o resultado oficial da copa se tomaría o do km 10, sendo este o primeiro control de dorsal e tempo de todos e todas as corredores/as.

Dende a FGM damos as gracias a todos e todas as participantes que se animaron a acudir a esta 1º proba da Copa Galega, o club organizador e os seus voluntarios pola súa labor e bo facer e tamén ó equipo arbitral.

Tamén pedimos desculpas polo acontecido, xa que puido ocasionar cambios nas clasificacións.