Cuntis acolleu unha espectacular marcha de 50 km cun percorrido cheo de natureza e patrimonio

O pasado sábado 7 de xuño, Cuntis foi escenario dunha das probas de sendeirismo máis completas e atractivas da tempada. Case 200 persoas participaron nesta marcha que, cun percorrido de 50 quilómetros dividido en dous aneis duns 25 km cada un, combinou natureza, patrimonio e un gran ambiente.

A pesar de que a participación foi algo inferior á esperada (unha verdadeira mágoa tendo en conta o enorme esforzo da organización), a marcha superou todas as expectativas en canto a calidade e coidado dos detalles. Os que non viñeron, perderon unha oportunidade estupenda de gozar dunha xornada única.

A sinalización do percorrido foi impecable, os avituallamentos estaban ben atendidos en todos os puntos (mesmo no último, como puido comprobar quen pechaba a marcha), e a atención ás persoas participantes foi exemplar, con asistencia mesmo nos controis finais e retirada de camiñantes con dificultades. A limpeza tamén foi un dos puntos fortes: o equipo de recollida avanzaba case a rentes do grupo de peche, deixando o monte como se nada tivese pasado.

O tempo acompañou, sen calor nin chuvia, e permitiu que se puidese gozar ao máximo dun trazado que sorprendía en cada paso: bosques de sequoias, regos e ríos con pasais, cruceiros, vellas preseiras e moitos outros puntos de interese salpicaban un itinerario moi ben deseñado. Cun perfil accesible e ben equilibrado, as subidas alternaban con longos tramos de progresión suave e baixadas prolongadas que facían máis levadeira a distancia total.

Unha marcha que deixou un moi bo sabor de boca e que agardamos ver repetir nas vindeiras edicións con maior participación, porque propostas así pagan moito a pena.