O Consejo Superior de Deportes (CSD), a través do programa estatal de apoio ao deporte do Ministerio de Educación, Formación Profesional e Deportes, fixo pública a resolución das bolsas destinadas a deportistas de alto nivel.
Nesta convocatoria, os deportes de montaña contarán con oito deportistas beneficiarios en todo o ámbito estatal, situándose como a cuarta modalidade deportiva con maior representación, só por detrás de Natación, Atletismo e Taekwondo.
A Federación Galega de Montañismo celebra especialmente que dúas destas bolsas recaian en deportistas galegos pertencentes ao Club Montaña Coruña: Nora García Maestu e Erik Paulo Noya Cardona, referentes da Escalada de Velocidade en Galicia.
Grazas a esta bolsa, ambos poderán continuar o seu proceso de formación e preparación no Centro de Alto Rendemento (CAR) de Sant Cugat del Vallès, un dos centros de referencia internacional para o deporte de alto nivel, onde adestran algúns dos mellores deportistas do panorama nacional e internacional baixo un modelo de preparación integral.
Ambos os dous levan varias tempadas consolidándose entre a elite nacional e internacional desta disciplina, representando con éxito á selección española e contribuíndo ao crecemento e proxección da Escalada de Velocidade galega nos principais escenarios deportivos.
Desde a Federación Galega de Montañismo queremos felicitar a Nora e Erik por este importante recoñecemento ao seu traballo, esforzo e dedicación, así como ao Club Montaña Coruña e ao seu equipo técnico polo labor desenvolvido durante estes anos.
Desexámoslles que esta bolsa supoña un novo impulso nas súas carreiras deportivas e que continúen acadando grandes éxitos levando o nome de Galicia aos máis altos niveis da escalada internacional.
Descubre máis desde Federación Galega de Montañismo
Subscríbete para recibir as últimas entradas no teu correo electrónico.