Este agosto, a montaña agárdate!

A FGM axúdache a estar preparado/a

Coa chegada do mes de agosto, moitas persoas federadas aproveitan as vacacións para dedicar máis tempo ao que realmente lles apaixoa: percorrer sendeiros, descubrir novas montañas, escalar, realizar travesías ou, simplemente, desfrutar da natureza e da vida montañeira.

Porén, na montaña sempre poden xurdir imprevistos. Un pequeno tropezo, unha caída, a rotura dunha presa durante unha escalada ou unha lesión poden alterar os nosos plans cando menos o esperamos.

Por iso, lembrámosvos que todas as persoas federadas dispoñen dun seguro de accidentes, un servizo fundamental que garante unha atención sanitaria adecuada e contribúe a que a recuperación sexa o máis rápida posible para volver desfrutar da montaña con todas as garantías.
Podedes consultar toda a información sobre o procedemento de actuación en caso de accidente en:
Información sobre accidentes da FGM

Ademais, para facer o proceso máis áxil, a App FGM permite tramitar o parte de accidentes de maneira autónoma, desde calquera lugar e a calquera hora. Este trámite é imprescindible para acceder á atención sanitaria prevista polo seguro, evitando esperas e sen depender do horario de oficina.

Se aínda non coñeces o funcionamento deste servizo, podes consultar a guía completa en:
Guía para cubrir partes de accidentes en liña

Dende a Federación Galega de Montañismo animámosvos a revisar estes procedementos antes de iniciar as vosas actividades estivais. Estar preparados tamén forma parte dunha práctica deportiva responsable.

Desfruta da montaña, móvete con responsabilidade e, se o precisas, utiliza as ferramentas que a FGM pon á túa disposición para que poidas volver ao que máis che gusta no menor tempo posible.