Comprácenos anunciarvos os detalles da primeira das actividades en colaboración FGM-FOP (Federación Galega de Montañismo – Fundación Oso Pardo) no marco do Proxecto LIFE Osos con Futuro, que levarase a cabo o vindeiro sábado 6 de maio nunha zona con presenza de oso pardo en Galicia.
A actividade é de balde e oriéntase a informar e formar aos usuarios dos sendeiros e montañas sobre como comportarse ante a presenza dun oso pardo. Percorreremos, acompañados de dous guías da Fundación Oso Pardo, aprox. 11 km da fermosa senda fluvial do río Lor dende Zanfoga (Pedrafita) ata o Acampamento do Caurel (Folgoso do Caurel).
O sendeiro é de dificultade media-baixa, e recomendamos a participación de menores acostumados a camiñar a partires dos 6 anos. Os menores deberán vir cun adulto ao seu cargo.
A hora estimada de saída é as 9:30 h no Acampamento O Caurel, de onde partiremos en taxis ata Zanfoga. Aínda que ao remate da actividade confraternizaremos cun pincho, recomendamos levar algo de comida e auga para o camiño.
Dado que as prazas son moi limitadas (30 prazas), pregamos aos inscritos que por causas de forza maior non poidan asistir, nos avisen o antes posible para poder facer uso da lista de agarda. Tamén que dentro das vosas posibilidades, vos organicedes en transporte compartido ata o punto de saída en taxi para deste xeito mobilizar o mínimo posible de vehículos e diminuír a pegada de carbono da actividade.
Para inscribirte preme no seguinte enlace: INSCRICIÓN SENDEIRISMO E OSOS CON FUTURO
Prazo de inscrición: ata o 28 de abril. Se quedasen prazas libres, ata o mércores 3 de maio de 2023.
O día anterior porémonos en contacto convosco por correo electrónico para formalizar os detalles da actividade e o lugar/hora de encontro. Para calquera dúbida podedes contactarnos nas canles habituais da FGM: https://fedgalmon.gal/
Con este evento participaremos como federación no evento da “Semana de Senderismo 2023 FEDME” optando ao “Premio á mellor actividade medioambiental”.
Por un Sendeirismo e Osos con Futuro
