Grazas, Paio

A Federación Galega de Montañismo quere expresar o seu recoñecemento e agradecemento a Paio Xosé Álvarez López polo labor desenvolvido como Seleccionador Galego de Escalada, así como pola súa contribución ao crecemento e fortalecemento da escalada galega de competición, especialmente no ámbito das categorías de base.

Durante a súa etapa á fronte da selección galega, impulsou e coordinou diferentes accións de tecnificación, adestramento e seguimento deportivo, favorecendo a mellora do rendemento, da formación e da evolución técnica dos e das deportistas participantes nos programas federativos.

Por decisión persoal, Paio decidiu pechar esta etapa á fronte da Selección Galega de Escalada, poñendo fin a un período de traballo, compromiso e dedicación ao desenvolvemento deportivo da nosa disciplina. Non obstante, continuará exercendo as súas funcións como seleccionador ata a celebración do Campionato de España de Seleccións Autonómicas (CESA), garantindo así a continuidade deportiva e técnica durante este período.

Paralelamente, a Federación Galega de Montañismo iniciou xa o proceso de procura dun novo ou nova Seleccionador/a Galego/a de Escalada, co obxectivo de asegurar unha transición ordenada e a continuidade do proxecto deportivo da selección.

O desempeño dun cargo técnico federativo abrangue, ademais do traballo directo co deportista, múltiples responsabilidades relacionadas coa planificación deportiva, a programación de actividades, os procesos de selección, a coordinación técnica e a relación con clubs, familias, persoal adestrador e demais axentes implicados no desenvolvemento deportivo. Un labor constante e complexo, fundamental para o funcionamento e consolidación dunha estrutura deportiva de rendemento, e que en moitas ocasións non resulta visible de cara ao exterior.

Dende a FGM queremos poñer en valor a dedicación, profesionalidade, formación e compromiso demostrados por Paio ao longo desta etapa, así como a súa implicación coa escalada e cos valores do deporte e da montaña.

A Federación Galega de Montañismo agradécelle o traballo realizado e deséxalle os maiores éxitos nos seus futuros proxectos persoais e profesionais.